Han, solo er ei rå og ærleg bok om einsemd som grensar til biografi.
Boktips av Maja: “Han, Solo” av Robin Van de Walle
Einsemd, som ein konstant pirkande finger eller ein hard knyttneve rett i brystet. Hovudpersonen Eg opplever einsemd etter at Han gjer det slutt. Korona og nedstengelser tilfører endå meir.
Gjennom bøker, kunst og popkultur prøver Eg å komma seg gjennom kjærleikssorga. Det blir ei reise inn i tidlegare einsemd og framtidige draumar for å finna seg sjølve igjen.
Maja Samsonstuen
Knarvik bibliotek
Om boka
Han, solo er ei forteljing om kjærleik, identitet og tilhøyrsel. Robin er 26 år og nett blitt forlaten av mannen han trudde var den eine. Den plutselege kjærleikssorga opnar for ei erkjenningsreise av dei sjeldne; ei gransking av eige liv og bakgrunn som skeiv utlending i Noreg. I denne sjangerutfordrande debutromanen blandast det høge og det låge på uanstrengt vis; Star Wars og Titanic, verdsrommet og havbotnen, språkfilosofi og tilfeldig sex. Men mest av alt handlar det om dei ulike formene for einsemd som kan gå som ein raud tråd gjennom livet - og om den evige leitinga etter ein heim.