«Når stemninga endrar seg»
Lesestund og bamsesjukehus på Knarvik bibliotek!
Gratis - inga påmelding
Kom på biblioteket å høyr forfattar Veronica Instebø frå Radøy lese frå boka «Når stemninga endrar seg». Dette er ei varm, ærlig og nær forteljing om korleis sjukdom kan snu kvardagen på hovudet. Og ta med kosedyret!
Gjennom augo til førskulejenta Elvira får vi oppleve livet når pappa blir sjuk av kreft, og korleis både ho, veslesystera Billie og resten av familien prøver å finne fotfeste i det som plutseleg har blitt annleis.
Dette er ei bok som inviterer barn og vaksne til å snakke saman om det som er vondt, og som minner oss om at midt i det mørke kan små lysglimt bety alt – ein klem, ein latter, eit håp.
Ei rørande og livsnær historie for alle som har opplevd at noko plutseleg endrar seg.
Det blir boksal, signering og bamsesjukehus etter opplesning.
Kl. 13:30 Bamsesjukehus
Etter lesestunda opnar me eit lite bamsesjukehus i biblioteket. Her kan barna få undersøkt kosedyret sitt og gi det litt ekstra omsorg. Har kosebamsen fått vondt i poten? Hostar sjiraffen litt om natta? Eller treng kaninen berre ein helsesjekk? Kanskje trengst det ein bandasje, ei sprøyte eller ein resept på tre klemmer om dagen. Bamselegane våre står klare.
Gratis og ope for alle. Ta med kosedyret ditt – bamsesjukehuset held ope til ca. kl. 14.30.
