Lånereglar

Slik vert du lånar

Alle innbyggjarar i Noreg kan få eit bibliotekkort. Du kan enten få eit digitalt eller eit fysisk bibliotekkort.

For å få eit digitalt lånekort, så loggar du deg på nettsida Bibliotekkortet og fyller ut informasjonen dei treng. Deretter møter du opp på eit av biblioteka i Alver kommune og viser strekkoden på det digitale bibliotekkortet. Så legg me deg inn i våre bibliotek. Har du eit fysisk bibliotekkort og ynskjer deg eit digitalt kort, så sjekk om du ligg inne ved å logge deg på nettsida Bibliotekkortet.

Viss du ynskjer eit fysisk bibliotekkort, så tek du med deg legitimasjon på biblioteket og snakkar med personalet der. Du har høve til å velje mellom eit lokalt kort eller eit nasjonalt kort. Det nasjonale kortet gjev deg tilgang til fleire digitale tenester og du kan bruke det på alle bibliotek i Noreg.

Barn låner på foreldra sitt kort fram til dei startar på skulen. Då får barna eit eige kort som ligg på skulen og vert brukt på skulebiblioteket. Det er mogeleg å få eit ekstra lånekort som barna kan bruke på biblioteket. Føresette må skrive under på avtale for barna. Det er også mogeleg for føresette og få digitale bibliotekkort til barna. Dei kan også registrerast på nettsida Bibliotekkortet.

Kva kostar det?

Det er gratis å få bibliotekkort.

Som lånar pliktar du å:

• ta med lånekortet når du skal låne
• handsame det lånte materialet fint
• levere lånt materiale innan fristen
• erstatte skadar på, eller tap av, materiale
• sørgje for å ta kontakt med biblioteket om du skiftar adresse, mobilnummer eller e-post.

Lånetid

• Bøker, teikneseriar og lydbøker: 4 veker
• Tidsskrift: 4 veker, men siste nummer vert ikkje lånt ut. Det er berre til lesing på biblioteket.
• "Snøgglån" (populære bøker): 2 veker
• DVD'ar: 1 veke
• Språkkurs: 8 veker
• Materiale frå andre bibliotek: eigarbibliotek bestemmer lånetida.

Det er gratis og inga avgrensing for kor mykje du kan låne på biblioteket.

Fornying av lån

Det er mogeleg å fornye det du har lånt to gonger viss ikkje andre har reservert det. Du kan fornye det du har lånt via automatane i biblioteket, e-post, telefon eller via heimesida til biblioteket. Snøgglån-bøker er ikkje mogeleg å fornye. Det er ikkje mogeleg å fornye fjernlån dvs bøker som biblioteket har lånt frå andre bibliotek på nettsidene våre. Då må du ta kontakt med biblioteket enten via e-post eller telefon.

Purring og erstatningskrav

Viss du ikkje leverar innan fristen, får du purring. Frå og med 23. april 2019, så krev ikkje biblioteket inn purregebyr, men ein vil framleis sende ut purringar. Biblioteket vil ha attende alt som vert lånt ut, slik at fleire kan ha glede av det.

Om du ikkje leverer materiale etter tre purringar, sender vi erstatningskrav for det du har lånt. Både dei som er under og over 15 år får erstatningskrav.

Prisane for erstatning er:

• Lydbøker for barn: 250 kr
• Lydbøker for vaksne: 450 kr
• Bøker for barn: 250 kr
• Bøker for vaksne: 450 kr
• DVD/CD-rom: 200 kr
• Tidsskrift/vekeblad: 100 kr
• Bygdebøker: 1000 kr

For materiale som tilhøyrer andre bibliotek (fjernlån), så kan det vere andre prisar. Alver bibliotek følgjer prisane til biblioteket som eig materialet.

Reservering og/eller bestilling

Det er mogeleg å reservere materiale som er utlånt eller under innkjøp.

Dette kan du gjere i biblioteket eller via heimesida vår, https://www.alverbibliotek.no

For å bestille materiale frå andre norske bibliotek, så må du enten ta kontakt med biblioteket eller bestille materiale på nettsida www.bibsok.no og få det tilsendt til biblioteket ditt. Det er berre lånarar som har nasjonalt bibliotekkort som får bestilt på nettsida Biblioteksøk. Når materialet som du har reservert eller bestilt kjem til biblioteket, vert det sendt ut ein sms, e-post eller brev til deg.