Meirope

Meirope bibliotek er tilgang til biblioteket når biblioteket er stengt og personalet ikkje er til stades for å hjelpe deg.

For å få tilgang til biblioteket utanom opningstid, så må du vere over 18 år og du må ta kontakt med personalet i biblioteket. Personalet aktiverar bibliotekkortet ditt slik at du kan kome inn utanom opningstid og dei viser deg korleis du gjer det.

Når du har fått tilgang, så gjeld den både på biblioteket i Knarvik og på Frekhaug. Du har tilgang til å vere på biblioteket frå kl. 7.00 til kl. 22.00 på kvardagar og kl. 7.00-20.00 på laurdagar og søndagar.

Biblioteket er eit offentleg rom og felles eigedom som skal vere til glede og nytte for alle. Du vert oppfordra til å halde ro og orden på det meiropne biblioteket.

For å oppgradere bibliotekkortet ditt til eit ”nøkkelkort” for meirope bibliotek må du:

· Ta ansvar for dei du eventuelt tek med deg inn på biblioteket som t.d. barna dine

· Ta vare på biblioteket ditt

· Ikkje vere til bry for andre

· Rette deg etter dei lånereglane som gjeld til ei kvar tid

· Hugse og lukke vindauge etter deg

Du er ansvarleg for bibliotekkortet ditt og korleis det vert brukt. Avtalen er personleg og brot på den kan føre til at retten din til tilgang til meirope bibliotek vert drege inn.

Biblioteklokala er videoovervaka. Overvakinga er for at du skal føle deg trygg og som vern av biblioteket sitt inventar og utstyr. Hærverk vil verte meldt til politiet. Opphald på det meiropne biblioteket skjer på eige ansvar.

Du har sjølv ansvar for å setje deg inn i kvar nødutgangane er i tilfelle evakuering av lokala. Brannalarmen vert gjeve som lydsignal og du må forlate biblioteket med ein gong brannalarmen går.

Du kjem deg inn på biblioteket ved å bruke bibliotekkortet som eit nøkkelkort. Du må passe på at ikkje andre enn dei som er med deg kjem inn. Døra vert automatisk låst når du har gått inn. Når du skal forlate biblioteket, så bruk dørknappen for å opne døra.

Du låner og leverer inn materiale ved å bruke utlånsautomatane. Fylg rettleiinga på skjermen.

Du kan hente materiale som du har bestilt. Dette materialet er ordna etter hentenummer og står på ei eiga hylle og må lånast ut på automaten før du tek det med deg. Hentenummeret står i meldinga som du har fått av biblioteket.

Av og til vil det vere arrangement når biblioteket er meirope. Arrangementa vert annonserte på nettsidene til biblioteket.

Det vil kome ei melding på høgtalaranlegget litt før det meirope biblioteket stengjer. Ljoset vert sløkt automatisk når det meirope biblioteket stengjer.

Viss du har problem med automaten eller andre ting, så ta kontakt med personalet når dei er til stades.