Klassebesøk

Takk for at de set av tid til å besøke biblioteket. Vi håpar de får godt utbytte av besøket. Her er nokre tips til kva de må hugse på før, under og etter besøket.

Før besøket:

• Sjekk at alle har bibliotekkort. For å bruke utlånsautomatane, så treng elevane ein pin-kode. Biblioteket kan lage denne viss den ikkje er kjend. Manglar nokon bibliotekkort, er det kjekt om de sender oss ein epost i forkant av besøket slik at vi kan ha klart eit nytt bibliotekkort.
• Gje beskjed om de ønskjer ei omvisning, tematiske bokpresentasjonar eller bibliotektimen (sjå lenger ned). De kan også kome på besøk og styre tida sjølve, men vi kan bidra om de ønskjer det.
• Informer oss om kor mange de er og når de kjem, og evt kor lenge de har høve til å bli. (På Frekhaug og Manger er det ønskeleg at gruppene ikkje er større enn rundt 15.)
• Snakk om korleis ein oppfører seg når ein er på biblioteket. Gå gjennom våre enkle bibliotekreglar (sjå under besøket)-

Under besøket:

Våre bibliotekreglar:

• Følg beskjedar frå dei som arbeidar på biblioteket.
• Heng klede og sko på tilvist stad
• Bruk innestemme og gå roleg rundt i biblioteket
• Vis omsyn til dei andre som er på biblioteket
• Spør oss gjerne om boktips
• Bruk gjerne automaten når de skal låne bøker, skann bibliotekkortet og skriv inn pinkoden.

Vi set stor pris på at de ryddar etter dykk, men er de usikker på kvar de fann ei bok, så ryddar vi den gjerne på plass etter dykk.

Etter besøket:

• Ta godt vare på bøkene de har lånt, og lever dei tilbake til biblioteket når de er ferdige med å lese dei.

Alver bibliotek sitt tilbod

Gje beskjed minst 14 dagar før de kjem, om de ønskjer å nytte eit av tilboda under. Då kan vi sikre at vi har nok folk på jobb, samt at vi får tid til å førebu oss.

Omvisning (15-20 min med bibliotekar, deretter på eiga hand)

Gruppa får ei omvising der vi har fokus på:
- Korleis biblioteket er organisert (1.-10.trinn)
- Deweyinndelinga for fagbøker (5.-10.trinn)

Vi viser fram kva slags bøker ein finn under dei ulike kategoriane, og snakkar noko om korleis ein kan finne fram på eiga hand.

Etter omvisninga er det tid for å låne bøker, og evt setje seg ned for å lese.

Tematisk bokpresentasjon (15-20 min med bibliotekar, deretter på eiga hand)

Gruppa får ein presentasjon av ulike bøker innan eit ønskt tema. Dersom temaet opnar for det, vert det både skjønnlitterære bøker og fagbøker. Gruppa må melde inn ønske om tema minst to veker før besøket.

Etter presentasjonen er det tid for å låne bøker, og evt setje seg ned for å lese.

Bibliotektimen (15-20 min med bibliotekar, deretter på eiga hand)

Gruppa får presentert smakebitar av ulike bøker som kan vere aktuelle for aldersgruppa. Det kan vere både nye og noko eldre bøker.

Etter leseøkta får elevane tid til å låne si eiga bok, for deretter å setje seg ned for å lese.