Forskningsdagane 2025: Kven eig sanninga?

Kven kan vi stole på i ei tid der informasjon blir filtrert, manipulert og spreidd gjennom stadig nye kanalar? Korleis påverkar teknologi, sosiale medium og kunstig intelligens kvardagen vår – og demokratiet vi lever i?

Denne kvelden får du høyre to forskarar som gir ulike innfallsvinklar til korleis sanning, informasjon og teknologi påverkar samfunn og menneske i dag:

• Kristin Skare Orgeret: Sanning under press
  Korleis blir informasjon spreidd, filtrert og manipulert gjennom desinformasjon, algoritmar og mediemakt – og kva betyr dette for tryggleik, samfunnstillit og demokrati? Kristin Skare Orgeret stiller desse spørsmåla, og utfordrar oss til å reflektere over korleis mediemakta formar samfunnet vi lever i.
  
  Kristin Skare Orgeret er professor ved Institutt for journalistikk og mediefag, OsloMet. Ho underviser i medium og journalistikk og forskar på mediets samfunnsrolle og maktrelasjonar.
  
• Lars Nyre: Teknologi tek styringa
  Vi som bur i vesle Noreg må akseptere at den teknologiske utviklinga er utanfor vår kontroll, medan datamaskiner, internett, sosiale medium og kunstig intelligens formar kvardagen vår og måten vi forstår verda på. Lars Nyre løftar fram dilemma i denne utviklinga – og spør kva vi kan gjere dersom vi ikkje likar retninga ho tek.
  
  Lars Nyre er professor i design og teknologiteori ved Universitetet i Bergen. Han har forska mykje på medieteknologi i eit historisk perspektiv og utgitt læreboka Teknologi. En teoretisk innføring (Universitetsforlaget 2024).

Etter foredraga inviterer vi til panelsamtale med forskarane, Silje Andvik Hoaas (kommunikasjonsleiar i Alver kommune) og Ståle Juvik Hauge (rådgjevar for samfunnstryggleik og beredskap i Alver kommune). Samtalen blir leia av Vegard Flatøy.

Arrangementet er gratis og ope for alle. Velkomen til ein tankevekkjande kveld på biblioteket i Knarvik!